මී පැනි

මීපැණි ගැන ඔබ නොදන්නා රූ රහස්..

  මීපැණි කියන්නේ මිහිපිට ජීවත් වන මිනිසුන්ට රන් හා සමාන ඖෂධයක්. එම නිසා දේශීය වෛද්‍ය විද්‍යාවේදී ද මීපැණි බහුල වශයෙන් යොදාගනු ලබනවා. තරුණ ඔබගේ රූ සපුව වැඩි කර ගැනීමට රූපලාවණ්‍යය කටයුතු වලදී මේ මීපැණි භාවිතා කරන්න පුළුවන්. මෙලෙස රූපලාවණ්‍යය කටයුතු වලදී මීපැණි භාවිතා කරන ආකාරයයි අද අපි ඔබට හෙළ අරණින් කියලා දෙන්න යන්නේ..

🔴 තරබාරුව මට්ටු කරන්නට "මීපැණි"

  මී පැණි කියන්නේ තරබාරුව මට්ටු කරන්න තිබෙන හොඳම ඖෂධ වලින් එකක්. ඔබ තරබාරුවෙන් පීඩා විඳින අයෙකු නම් මෙම මීපැණි වලින් ඔබට බොහෝ ප්‍රතිඵල ලබාගත හැකියි.

🔶. කලාඳුරු අල, අරළු, බුළු, නෙල්ලි කළං 01 යි මදට 8 බැගින් ගෙන උණු වතුර පත අට එකට සිඳුවා උදේ සවස මීපැණි මිශ්‍ර කර පානය කරන්න.

🔶. මී පැණි බින්දු කිහිපයක් කුරුඳු කුඩු සමඟ මිශ්‍ර කර උණු වතුරට දමා හිස් බඩට බොන්න.

🔶. හීන් මිදි මුල් යුෂ මී පැණි මිශ්‍ර කර පානය කරන්න.

🔴 කෙට්ටු අයට මහත් වෙන්න "මීපැණි"

  මහත අය කෙට්ටු කරන්න වගේම කෙට්ටු අය මහත් කරන්නත් මී පැණිවලට අද්විතීය බලයක් තියෙනවා. ශරීරයට පිරුණු බවක් එක්කර ගැනීමට අවශ්‍ය නම් මේ ඖෂධ ප්‍රතිකාර ක්‍රම අත්හදා බලන්න ඔබටත් පුළුවන්.

🔶. අලුත් උක් හකුරු, එළඟිතෙල්, මීපැණි මිශ්‍ර කර ගුලියක් සාදා උදේ සවස කෑමට ගන්න.

🔶. අලිපේර, ඇම්බුම්, රතඹලා, ආනමාළු, ඉදුණු අළු කෙසෙල් මී පැණි සමඟ මිශ්‍ර කර ගුලියක් සාදා ආහාරයට ගන්න.

🔴 තරුණ බව රැකගැනීමට "මීපැණි"

  වයසට යෑමත් සමඟ සිදුවන සම එල්ලා වැටීම, ඇස් වටා, මුඛය වටා එන රැළි වැටීම් වළක්වා ගැනීමට මී පැණි උපකාරී වනවා.

🔶. නෙල්ලි කුඩු වලට, නෙල්ලි යුෂ, මීපැණි, එළඟිතෙල් මිශ්‍ර කර ගුලි සාදා කෑමට ගන්න. මෙහිදී එළඟිතෙල් හා මී පැණි අසමානව ගත යුතුයි.

🔶. වළඟසාල් කුඩු, තිප්පිලි කුඩු, සූකිරි කුඩු, මීපැණි, තලතෙල් හා එළඟිතෙල් මිශ්‍රකර තේ හැඳි 02 බැගින් එළකිරි සමඟ උදේ සවස කෑමට ගන්න.

🔴 පැහැපත් සමකට "මීපැණි"

  පැහැපත් සමක් සෑම යුවතියකගේම සිහිනයක් බව අපි දන්නවා. ලප, කැළැල්, කුරුලෑ නොමැති සුන්දර සමකට මීපැණි වලින් කළ හැකි සත්කාර බොහෝමයි.

🔶. කිරිපිටි තේ හැඳි 05 යි, ආමන්ඩ් කුඩු තේ හැඳි 05 යි, අමුක්කරා කුඩු තේ හැඳි 05 යි. දෙහි යුෂ බිංදු 05 යි. මී පැණි බිංදු 05 යි එකට මිශ්‍ර කර මුහුණේ ගල්වන්න.

🔴 කාන්තිමත් කෙස් කලඹකට "මීපැණි"

  දිගු කෙස් කළඹක සුන්දර සිහිනය සැබෑ කරගන්නට මීපැණි වලින් කළ හැකි සත්කාර රැසක් තිබෙනවා. මෙම සත්කාර මඟින් ශක්තිමත්, දිගු, කළුවන් කෙස් කලඹක් ලබාගන්න පුළුවන්.

🔶. ගොටුකොළ යුෂ මේස හැඳි 02 ක්, මීපැණි බිංදු 04 ක් සමඟ උදේ සවස පානය කරන්න.

🔶. රසකිඳ කොළ යුෂ මේස හැඳි 02 ක්, මී පැණි බිංදු 04 ක් සමඟ දිනපතා පානය කරන්න.

🔴 රෝස වර්ණයෙන් යුත් දෙතොලකට "මීපැණි"

  දෙතොල් වල රෝස පැහැය වැඩිකර ගැනීමට මීපැණි මඟින් කළ හැකි විශේෂ සත්කාර තිබෙනවා. එමඟින් අවපැහැ ගැන්වුණු අඳුරු දෙතොලක් වුවත් රෝස පැහැ ගැන්විය හැකියි.

🔶. පිරිසුදු මී පැණි ආලේප කර මිනිත්තු 30 කට 30 කට පසුව සෝදා ඉවත් කරන්න.

🔶. දොඩම් ලෙල්ලක පැඟිරි මී පැණි සමඟ  මිශ්‍රකර දෙතොල්වල ආලේප කරන්න.

🔴 කටහඬ මිහිරි වීමට "මීපැණි"

  බාහිර ස්වරූපයේ තිබෙන සුන්දරත්වය වගේම කටහඬ මිහිරි වීමත් යුවතියකගේ ආකර්ෂණය තවත් වැඩි කරවනවා. කටහඬ මිහිරි කර ගැනීමටත් මීපැණි වලින් කල හැකි සත්කාර තිබෙනවා.

🔶. වියළි ඉඟුරු, උක්හකුරු, සමව ගෙන මීපැණි සමඟ මිශ්‍ර කර කන්න.

🔶. වසාවාසි, තිප්පිලි සමව ගෙන මීපැණි සමඟ මිශ්‍රකර කන්න.

🖊️උපුටාගැනීම..